Nos Seus Pés

É un festival solidario organizado por veciños e veciñas do Grove que comparten o obxectivo de recadar fondos económicos para a ONG Proemaid e poñer en boca de todos os dereitos das persoas refuxiadas e desprazadas.

Despois da Festa do Marisco, o Concello do Grove colabora deixando a carpa de concertos unha semana máis. O festival é gratuíto, aínda que actividades como Nos Seus Pesiños teñen unha entrada simbólica para que a rapazada máis pequena colabore.

Proemaid é unha organización sen ánimo de lucro fundada en 2015 por profesionais das emerxencias que voluntariamente estiveron prestando axuda en situacións de crise humanitaria a nivel internacional e nacional. A súa orixe sitúase nas accións de rescate no mar Exeo.

O Proxecto Auga nace no verán de 2016 no campo de refuxiados de Pikpa, na illa de Lesbos. Os rescatadores de Proemaid observaron que os debuxos que facían os nenos reflectían situacións traumáticas relacionadas co mar, e xurdiu a idea de organizar clases de natación como pretexto para axudarlles a superar esa realidade. Actualmente lévase a cabo en Tenerife e en Sevilla.